Fikir verirsinizsə, mediamızın əsas diskussiyaları çoxdan olub keçmiş hadisələr ətrafındadır. Məsələn, Fyuzat-Molla Nəsrəddin qarşılaşdırması tipli yazılar. Mediamızın əsas müsahibləri bu günü yaradanlar, dəyişənlər yox, metafizika ilə əlləşənlərdir. Mediamızın əsas sensasiya yazıları Qərb hökumətlərinin keçmişdəki bəd əməlləri haqda ittihamlardır. Məsəl üçün, Sibel Dəniz Edmondsun ABŞ kəşfiyyatı ilə terror qruplarının əlbirliyi barədə iddiaları.
Edmondsun dediklərini 14 il qabaq Amerika dinləyib. Amerika mediası müzakirə edib. Amerika Konqresi istintaq aparıb. Oxucuya sensasiyalı məlumat vermək istəyirsinizsə, yenisini deyim. İsraillə Amerika kəşfiyyatının İranın uranzənginləşdirməsini sayber hücumla sabotaj eləməsi haqda məxfi məlumatı mətbuata ötürən general, Birləşmiş Qərargahların rəhbərlərinin sədr müavini Karlrayt (Cartwright) məhkəmələrdə sürünür – götürün yazın. Əgər məqsəd məlumatlandırmaqdırsa. Əgər doğrudan məlumatlandırmaqdırsa, yerli təhlükəsizlik orqanları haqda müstəqil araşdırma aparın.
Məncə, bizim medianın məqsədi nə məlumatlandırmaqdır, nə problemləri aşkarlamaqdır, nə diskussiyadır. Bəs nədir? Yuxarıdanmı belə sifariş verilir? Redaktorlar öz təşəbbüsləri iləmi gündəlikdən qaçırlar? Bunu da bilmirəm. Bildiyim odur ki, toplumun işinə yaramayan bu tip media hökumətin xoşuna gəlir. Ancaq mövzu ölüdürsə, media da ölüdür. Bildiyimiz kimi, ölü olan yerdə mollanın işi yağ gedir. Yəni bu tip mediadan ən çox yararlananlar din ekspansionistləridir.
