Milli Məclisin rəsmi orqanı – Azərbaycan qəzeti bir tənqidi yazı yayımlayıb. Space TV-də hava proqnozunun aparıcısının qaradərili (afrikalı) olmasına irad tutub. TV-ni “zövqsüzlük”də, “Azərbaycan qadınının gözəlliyinə biganəlik”də, “dönüklük”də günahlandırıb. (Milli-mənəvi dəyərlər isterikası bu formada da peyda olur.) Bu hələ dərdin yarısıdır. Space TV bu tənqiddən sonra Afrika mənşəli aparıcsını işdən qovub.
80-ci illərin sonlarında biz jurnalistika fakültəsində oxuyanda gözləyirdik ki, yenidənqurma rəsmi qəzetləri, dövlət TV-lərini silib tarixin arxivinə atacaq. O dövrün gənclərinin inandığı, düşündüyü bu idi. Ölkə müstəqil olanda isə buna tam əmin idik. Ancaq nə qədər dəyişikliklər oldu, nə qədər zaman keçdi, bu tip media yerində qaldı, qol-budaq atdı, yaşlandı, hörmətləndi.
Bu ağsaqqal mediaya hörmət eləməyən, onun tarixin arxivinə atılmasını istəyən gənclərin yanındayam.
