“Mafiya” sözünü sovet adamlarının çoxu kinodan eşitmişdi (“Sprut” filmi), bir də aşkarlıq dövründə “üskük mafiyası” tipli sensasyalı məqalələrdən. Bunu da yalnız Moskva mətbuatı yaza bilərdi. Sovetlərin son illəri Bakıda Nəcəf Nəcəfovu, Məmməd İsmayılı və ola da bilsin, başqa bir redaktoru çıxmaqla bütün redaktorlar başlarının milçəyini qoruyurdular.
Həyatda mafyanı 1987-ci ildə o vaxtkı 28 Aprel, indiki 28 May, bəlkə də gələcəkdəki 15 İyun metrosunun həndəvərində görmüşdüm. Tam üskük mafyası da deyildi, ancaq iş prinsipləri eyni idi. Bir loto dəzgahı qoymuşdular. Adamlar beş-üç manat verib nömrələr alırdılar. Dəzgahın arxasında duran ceyil şəffaf qutudakı 5-6 topu çarxla fırladırdı. Üstə sıçrayıb dayanan topu tez götürüb növbə ilə az qala hamının gözünə soxurdu. Məsələn: “4! kimdədi 4? Səndə. Sən uddun qardaş. Düz aldın uddun, səhv aldın uduzdun. Gəlin şansınızı sınayın”. Əlindəki dəstə puldan bir manat saxlayır, qalanını “udana” verir. Hər şey sanki göz qarşısında idi. Topu avtomat seçir, üstə hansı top çıxsa onu götürüb göstərirlər. Ancaq sirr gözə ən çox soxulan şeydə idi. Topun üstündə yazılan rəqəmdə. Masa başına toplaşanların yarısı onların öz adamları idi. Hamısı bir ağızdan top gözlərinə yaxınlaşdırılanda eyni rəqəmi deyirdilər. Ancaq topun üstündə çin əlifbası ilə nəsə yazılmışdı. Masa qırağındakı qalan adamlar nə yazıldığını ayırd eləyə bilmir, ətrafdan deyilənləri təkrarlayıb gerçəkdən uduzurdular. Bir nəfər bunu duydu. istədi hay-küy salsın. Masa ətrafındakılar onu sıxışdırıb gizlincə arxa sıraya keçirdilər və hədələdilər. Yəni “rəqəm harda yazılıb, göstər” sualını verəni gedib tində öldürə də bilərdilər.
İndi yəqin Bakıda elə şeylər yoxdu. Hara çəkiliblər o adamlar bilmirəm.
O adamlar yoxdur, ancaq həmin prinsiplə işləyənlərə mən çox sonralar rast gəldim. Məsəl üçün, bir alim çıxıb deyir ki, Quranda həndəsi düsturlar var, riyazi toremlər var, fizika qanunları var, UZİ var, DNK var, nə bilim böyük partlayış var. Və bir-iki çırpışdırma sözü gözümüzə soxur. Ətrafda xeyli adam onu təsdiqləyir. “Göstər, sübut elə, konkret harda deyilib” deyən olarsa sıxışıdırırlar bir tinə.
Bu gün Azərbaycana, Türkiyəyə, İrana və başqa ölkələrə səpələnmiş islam araşdırmalar mərkəzləri, ilahiyyatçı təşkilatları, türk-islam konseyləri təxminən həmin prinsiplərlə çalışırlar. “Göstər, sübut elə deyəni əvvəlcə yumşaq danlayırlar. Tutalım, niyədinimizə hörmət eləmirsən, niyə hörmətli alimə elə dedin, niyə ziyalımızı gözdən saldın… Sonra təhqirə keçirlər. Supergüclərə satılan, qınından çıxıb qınını bəyənməyən, yad güclərə işləyən, erməni dəyirmanına su tökən…” Növbədə tində küncə sıxmaqdır. Nə isə belə təşkilatlar göründüyündən çox dərinə işləyib. Bu gün baxıram ki, belə təhlilçilərdən biri – Quranda 19 rəqəmi deyilən lotonun bilicisi Facebook profilində Harvard araşdırmaçısı kimi təqdim olunur. Miqyas çox genişdir yəni. Normal araşdırmaçıların niyə elm mərkəzlərində çalışmamasının, niyə titullarının olmamasının səbəbini anladınız yəqin. Bu əhvalatda mənə ən ağır gələn şey bir azərbaycanlı alimin bir türk fırıldaqçının toruna düşməsidir. Mən ərəb dilini iki il yarım öyrənmişəm, Quranın 5 dildə 40-a yaxın variantda tərcümələrini oxumuşam. Edip Yüksəlin hesabı saxtalaşdırdığını çox aşkar görürəm. Ancaq bizim bəzi ilahiyyaçı adlananların bu saxtakarlığı görməməsinə mat qalıram. Yeniyetmələrin Edipin toruna düşməsi normaldır, çünki onlar axtarışdadır, qeyri-adi fikirlərə maraq göstərirlər. Ancaq yetkin alimlər üçün Edipə inanmaq, onun dediyini yoxlamamaq ayıbdır.
Bəlkə də Edip Yüksəlin yalan dediyini bilirlər, ancaq mafiyanın sirrinin açılması onlara sərf eləmir.
