Son iki həftədə xəbər mediamız neçə ördək, neçə xoruz buraxdı. 40, 50, 80 erməni əsgərinin öldürülməsi, 2 kəndimizin aşkar, 2 rayonumuzun xəlvətcə geri qaytarılması… Ancaq 15 əsgərimizin öldürülməsindən, bir erməninin sərhəddimizi keçib Tovuza gələrək bir uşağın və bir qadının yanına düşüb qoyun kimi gedib generalımızın hüzuruna çıxmasından və mətbuatımız demişkən, dünyasını “exchange” eləməsindən başqa ortada bir təsdiqlənmiş məlumat da yox. Bir sözlə, söz müharibəsi. Xəbər siyasiləşəndə ördək də buraxılmalıdır, qaz da. (Söz müharibəsi deyəndə bu qaz hardan ağlıma gəldi?) Gözləmək olardı ki, hansısa peşəkar qurum qazların buraxılmasına, yəni jurnalistikanın siyasiləşdirilməsinə qarşı çıxacaq. Bəlkə Mətbuat Şurası yığışdıra bu quşları? Onun bəyanatına göz gəzdirək:
“Şura cəmiyyətin yanlış yönləndirilməsinin qarşısının alınmasının vacibliyini rəhbər tutur. Buna görə də həmin nəticələri müvafiq tədbirlərin görülməsi üçün aidiyyəti orqanlara təqdim edəcək.”
“Qloballaşma şəraitində istənilən müharibədəki qələbənin informasiya müstəvisində qazanıldığı reallığını….” “KİV-in dövlətçiliyə sədaqət, milli mənafe prinsipiallığı ruhunda fəaliyyət göstərməsi müstəsna önəm daşımaqdadır”.
Bir sözlə, Şura bu qazın üstünə spiçka çəkdi. Dediyindən belə çıxdı ki, yalan buraxmaq olar, ancaq bu yalan gərək müqəddəs yalan ola. İnformasiya toplumu məlumatlandırmaq üçün deyil, onu yönləndirmək üçündür. Yəni ictimaiyyət arasına qaz-ördək, xoruz buraxmaq ayıb deyil. Qloballaşma şəraitində bu təbii, gərəkli bir qazdır. Ancaq bu, dövlətçiliyimizə, mentalitetimizə, vətənpərvərliymizə xidmətt eləyən qaz olmalıdır.
Növbə çatdı sivil topluma (hərçənd Şura da gərək sivil toplumdan ayrı sayılmaya). Bəlkə onlar Mətbuat Şurasının açıq aşkar, öz dili ilə medianı siyasi maraqlara tabe eləməsinə qarşı çıxalar? Deməli bu gün bir sivil toplum qurumu bəyanat verərək Mətbuat Şurasını “aktiv hərbi əməliyyatlar şəraitində jurnalistlərin necə davranmalı olmaları barədə treninglər” keçməyə çağırıb.
Sözümün məmmədqulusu: bir qurum çıxıb demir ki, bu qazı, ördəyi buraxmaq jurnalistika adına ayıb bir şeydir. Hər kəs qazı necə buraxmağı öyrətmək üzrə hocadır və ya onu peşəkar buraxmaq yollarını göstərir.
